ໃນຕອນເຊົ້າ ຂອງວັນທີ 17 ພຶດສະພາ 2024 ສະມາຊິກກຳມະບານຮາກຖານ ພະແນກເຕັກໂນໂລຊີ ແລະການສື່ສານ ແຂວງຈຳປາສັກ ໄດ້ໄຂກອງປະຊຸມໃຫຍ່ຄັ້ງທີ III ຂອງຕົນຂື້ນຢ່າງເປັນທາງການ ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ວິໄລ ແກ້ວມະນີໄລ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກ ເຕັກໂນໂລຊີ ແລະ ການສື່ສານ, ສະຫາຍ ແສງດາວັນ ຟອງວົງສາລາດ ຮອງປະທານສະຫະພັນກຳມະບານແຂວງຈຳປາສັກ, ມີຄະນະ 3 ອົງການຈັດຕັ້ງມະຫາຊົນ, ແຂກຖືກເຊີນຈາກສະມາຊິກກຳມະບານອ້ອມຂ້າງແຂວງ ແລະ ສະມາຊິກກຳມະບານພາຍໃນພະແນກເຕັກໂນໂລຊີ ແລະ ການສື່ສານ ແຂວງຈຳປາສັກ ເຂົ້າຮ່ວມທັງໝົດ 36 ສະຫາຍ, ຍິງ 13 ສະຫາຍ.ກອງປະຊຸມຄັ້ງນີ້ ສະຫາຍ ທຽນໄຊ ສະຖາພອນ ປະທານກຳມະບານຮາກຖາກ ພະແນກເຕັກໂນໂລຊີ ແລະ ການສື່ສານ ແຂວງຈຳປາສັກ (ຜູ້ເກົ່າ) ໄດ້ຂື້ນກ່າວເປີດພິທີ ພ້ອມທັງຜ່ານບົດສະຫຼຸບຕີລາຄາຜົນງານ ການເຄື່ອນໄຫວນຳພາຈັດຕັ້ງປະຕິບັດວຽກງານໄລຍະ 5 ປີ ຜ່ານມາ ແລະ ຜ່ານທິດທາງແຜນການ 5 ປີ ຕໍ່ໜ້າ ຂອງ ກຳມະບານຮາກຖານ ພະແນກເຕັກໂນໂລຊີ ແລະ ການສື່ສານ ແຂວງຈຳປາສັກ. ພ້ອມກັນນີ້ສະຫາຍ ທຽນໄຊ ສະຖາພອນ ໄດ້ຜ່ານບົດສຳຫຼວດການນຳພາລວມ, ຈາກນັ້ນກໍໄດ້ມີການກ່າວອໍາລາໜ້າທີ່.ກອງປະຊຸມໄດ້ດຳເນີນການຄັດເລືອກເອົາຄະນະກຳມະບານຮາກຖານ ພະແນກ ຕສ ແຂວງ ຊຸດໃໝ່ ເພື່ອໃຫ້ບັນດາສະຫາຍສະມາຊິກກຳມະບານ ໄດ້ໃຊ້ສິດປະຊາທິປະໄຕຂອງຕົນປ່ອນບັດ, ພ້ອມກັນນັ້ນກໍ່ໄດ້ນໍາໃຊ້ລະບົບນັບຄະແນນແບບທັນສະໄໝຜ່ານໂທລະສັບມືຖື ຄຽງຄູ່ກັນ ເພື່ອເລືອກເອົາຄະນະກຳມະບານຮາກຖານພະແນກ ຕສ ແຂວງ ຊຸດໃໝ່ ເຊິ່ງມີຜູ້ສະໝັກ 5 ສະຫາຍເລືອກເອົາ 3 ສະຫາຍ

 

ພ້ອມນັ້ນຄະນະປະທານ ພ້ອມດ້ວຍ 3 ສະຫາຍທີ່ໄດ້ຮັບຄວາມເຊື່ອໝັ້ນໄວ້ວາງໃຈໃຫ້ດຳລົງໜ້າທີ່ເປັນຄະນະຊຸດໃໝ່ ກໍໄດ້ເປີດກອງປະຊຸມຄັ້ງປະຖົມມະລຶກຂຶ້ນ ເພື່ອລົງເລີກປຶກສາຫາລືກັນ ໂດຍຮັບຟັງຄຳຄິດຄຳເຫັນຂອງແຕ່ລະສະຫາຍ, ຄຳແນະນຳຂອງສະຫະພັນກຳມະບານສາຍຕັ້ງ, ຈາກນັ້ນກອງປະຊຸມໄດ້ເປັນເອກະພາບສູງ ເລືອກເອົາຄະນະກຳມະບານຮາກຖານພະແນກ ຕສ ຊຸດໃໝ່ ເຊິ່ງປະກອບມີ:

- ສະຫາຍ ອາພິສິດ ມະນີວົງ ເປັນປະທານກຳມະບານຮາກຖານ

- ສະຫາຍ ບົວໄລ ແກ້ວມະນີວົງ ຮອງປະທານ ທັງເປັນປະທານກວດກາ

- ສະຫາຍ ເລນີນ ດວງພູມີ ຄະນະ

ຕອນທ້າຍຂອງກອງປະຊຸມ, ສະຫາຍ ວິໄລ ແກ້ວມະນີໄລ ກຳມະການພັກແຂວງ ເລຂາພັກຮາກຖານ, ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງຈຳປາສັກ ແລະ ສະຫາຍ ແສງດາວັນ ຟອງວົງສາລາດ ຮອງປະປະທານສະຫາພັນກຳມະບານ ແຂວງຈຳປາສັກ ກໍໄດ້ສະແດງຄວາມຊົມເຊີຍຜົນສໍາເລັດຂອງກອງປະຊຸມ ແລະ ໃຫ້ກຽດໂອ້ລົມຕໍ່ກອງປະຊຸມໃຫຍ່ ຄັ້ງທີ III ຂອງໜ່ວຍກຳມະບານຮາກຖານ ພະແນກເຕັກໂນໂລຊີ ແລະການສື່ສານ ແຂວງຈຳປາສັກ. ຊຶ່ງເນັ້ນໃຫ້ຄະນະກຳມະບານຊຸດໃໝ່ຕ້ອງໄດ້ເອົາໃຈໃສ່ສຶບຕໍ່ປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ຂອງກຳມະບານລາວວາງອອກ ສິ່ງສຳຄັນຕ້ອງເອົາໃຈໃສ່ສຶກສາອົບຮົມການເມືອງແນວຄິດໃນຖັນແຖວສະມາຊິກໃຫ້ຮັກສາໄດ້ຄວາມສາມະຄີເປັນປຶກແຜ່ນ, ເຮັດວຽກງານວິຊາສະເພາະໃຫ້ໂດດເດັ່ນຄຽງຄູ່ກັບການປະຕິບັດຂໍ້ແຂ່ງຂັນ 5 ເປັນເຈົ້າ ໃຫ້ມີປະສິດທິຜົນ ແລະ ກ້ວາງຂວາງ.

ກອງປະຊຸມໄດ້ປິດລົງ ໃນເວລາ 12:00 ໂມງ ຂອງມື້ດຽວກັນ

ພາບ ແລະ ບົດຂ່າວ: ໄຊຊະນະ ແສງມະນີ