ຕອນບ່າຍວັນທີ 16 ພະຈິກ 2023 ນີ້, ສາມໜ່ວຍພັກທີ່ຂື້ນກັບຄະນະພັກຮາກຖານພະແນກເຕັກໂນໂລຊີ ແລະ ການສື່ສານ (ຕສ) ແຂວງຈໍາປາສັກ ໄດ້ປະເມີນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2023. ກອງປະຊຸມຈັດຂຶ້ນຢູ່ທີ່ຫ້ອງປະຊຸມພະແນກ ຕສ ແຂວງ ໂດຍການເຂົ້າຮ່ວມຂອງ ສະຫາຍ ວິໄລ ແກ້ວມະນີໄລ ກໍາມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກ ຕສ ແຂວງ, ສະຫາຍ​ ຕິ່ງ​ແກ້ວ​ ບຸບຜາລາວັນ​ ຮອງປະທານຄະນະກວດກາພັກ,​ ຮອງຫົວໜ້າອົງການກວດກາລັດແຂວງ, ມີຄະນະກໍາມະການກວດກາປະເມີນຜົນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂັ້ນແຂວງ, ເລຂາ - ຮອງເລຂາ 03 ໜ່ວຍພັກ ທີ່ຂຶ້ນກັບຄະນະພັກຮາກຖານ, ຕາງໜ້າອົງການຈັດຕັ້ງມະຫາຊົນ ຊາວໜຸ່ມ, ແມ່ຍິງ, ກໍາມະບານ, ພ້ອມດ້ວຍສະມາຊິກພັກ ພາຍໃນ 03​ ໜ່ວຍພັກຄື​: ໜ່ວຍພັກພະແນກ ຕສ ແຂວງ, ໜ່ວຍພັກບໍລິສັດ ອີທີແອລ ຈໍາກັດ ສາຂາແຂວງຈໍາປາສັກ​ ແລະ ໜ່ວຍພັກບໍລິສັດ ລັດວິສາຫະກິດໄປສະນີລາວ ສາຂາແຂວງຈໍາປາສັກ ເຂົ້າຮ່ວມ. 

      ໃນກອງປະຊຸມ ໄດ້ຮັບຟັງການຜ່ານບົດລາຍງານການກະກຽມການດໍາເນີນການປະເມີນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ປະຈໍາປີ 2023​, ຜ່ານບົດລາຍງານການປະເມີນຜົນຂອງ 03 ອົງການຈັດຕັ້ງມະຫາຊົນ ຊາວໜຸ່ມ, ແມ່ຍິງ, ກໍາມະບານ, ຜ່ານບົດລາຍງານການປະເມີນຜົນພະນັກງານ-ລັດຖະກອນ ປີ 2023 ແລະ ຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ແລະ ທິດທາງແຜນການປີ 2024, ຜ່ານບົດສໍາຫຼວດການນໍາພາລວມຂອງໜ່ວຍພັກ. ຈາກນັ້ນ ຜູ້ແທນກອງປະຊຸມ ກໍໄດ້ປະກອບຄໍາເຫັນຕີລາຄາ ຕໍ່ກັບບົດສະຫຼຸບຕ່າງໆ ເພື່ອໃຫ້ມີເນື້ອໃນຄົບຖ້ວນສົມບູນ ແລະ ນໍາສະເໜີຄະນະພັກ - ຂັ້ນເທິງ ອະນຸມັດຮັບຮອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນໂອກາດຕໍ່ໄປ. ສາມ​ໜ່ວຍພັກທີ່ຂື້ນກັບຄະນະພັກຮາກຖານພະແນກເຕັກໂນໂລຊີ ແລະ ການສື່ສານ ແຂວງຈໍາປາສັກ​ ສາມາດຕີລາຄາສະມາຊິກພັກ ປະເພດ ແຂງ ແລະ ຕີລາຄາໜ່ວຍພັກ ເປັນໜ່ວຍພັກ ເຂັ້ມແຂງ.

       ຕອນທ້າຍກອງປະຊຸມ ສະຫາຍ ວິໄລ ແກ້ວມະນີໄລ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກ ຕສ ແຂວງ ປະທານກອງປະຊຸມ ກໍໄດ້ຕາງໜ້າຄະນະພັກຂັ້ນເທິງ ມີຄໍາເຫັນໂອ້ລົມຊີ້ທິດເຍືອງທາງ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານໃນຕໍ່ໜ້າ.

ພາບ-ຂ່າວ: ກໍວິຊິດ​ ໂສພັນທະວົງ