ວັນທີ 14 ພະຈິກ 2024, ພະແນກເຕັກໂນໂລຊີ ແລະ ການສື່ສານ(ຕສ) ທີ່ຂຶ້ນກັບຄະນະພັກຮາກຖານພະແນກ ຕສ ແຂວງຈໍາປາສັກ ເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2024. ກອງປະຊຸມຈັດຂຶ້ນຢູ່ຫ້ອງປະຊຸມຊັ້ນສອງພະແນກ ຕສ ໂດຍເປັນປະທານຮ່ວມຂອງ ສະຫາຍ ສົມຈິດ ໂພທິສານ ຮັກສາການເລຂາຄະນະພັກຮາກຖານພະແນກ ຕສ ແຂວງ, ສະຫາຍ ນາງ ສີສົມໄຊ ສິງດາລາວອນ ຫົວໜ້າຂະແໜງພັກ ຄະນະຈັດຕັ້ງແຂວງ, ສະຫາຍ ປອ​ ທຽນໄຊ ສະຖາພອນ ເລຂາໜ່ວຍພັກ ພະແນກ ຕສ. ມີຄະນະກໍາມະການປະເມີນຜົນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນຂັ້ນແຂວງ, ເລຂາ - ຮອງເລຂາໜ່ວຍພັກ, ຄະນະໜ່ວຍພັກ ທີ່ຂຶ້ນກັບກັບຄະນະພັກຮາກຖານພະແນກ ຕສ ແຂວງ, ຕາງໜ້າອົງການຈັດຕັ້ງມະຫາຊົນ ຊາວໜຸ່ມ, ແມ່ຍິງ, ກໍາມະບານ ພ້ອມດ້ວຍສະມາຊິກພັກ ພາຍໃນໜ່ວຍພັກ ເຂົ້າຮ່ວມທັງໝົດ 22 ສະຫາຍ, ຍິງ 09 ສະຫາຍ.

ໃນກອງປະຊຸມ,ສະຫາຍ ປອ​ ທຽນໄຊ ສະຖາພອນ ເລຂາໜ່ວຍພັກ ພະແນກ ຕສ ໄດ້ລາຍງານຫຍໍ້ບາດກ້າວ, ຂັ້ນຕອນການກະກຽມ ແລະ ດໍາເນີນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2024.

ສະຫາຍ ນາງ ສຸດສາຄອນ ທອງຈະເລີນ ຮອງເລຂາໜ່ວຍພັກ ກໍໄດ້ຜ່ານບົດສະຫຼຸບການກໍ່ສ້ງໜ່ວຍພັກປອດໃສ, ເຂັ້ມແຂງແລະ ໜັກແໜ້ນ ປະຈຳປີ 2024 ແລະ ທິດທາງແຜນການປະຈໍາປີ 2025.

ພ້ອມນີ້, ສະຫາຍ ນາງ ໄໝທອງ ເກດຮັກສາ ປະທານກວດກາໜ່ວຍພັກ ກໍໄດ້ຜ່ານບົດສໍາຫຼວດການນໍາພາລວມຂອງ ໜ່ວຍພັກ.ໜ່ວຍພັກ ພະແນກ ຕສ ແຂວງ ເປັນໜ່ວຍພັກໜຶ່ງທີ່ຂື້ນກັບຄະນະພັກຮາກຖາກພະແນກ ຕສ ແຂວງ ປະຕິບັດພາລະບົດບາດ, ສິດ ແລະ ໜ້າທີ່ໃນການສຶກສາອົມຮົມການເມືອງ - ແນວຄິດໃຫ້ແກ່ສະມາຊິກພັກ, ນໍາພາເຕົ້າໂຮມຄວາມສາມັກຄີ, ຮັກສາຄວາມສະຫງົບພາຍໃນໜ່ວຍພັກ, ຄວາມເປັນລະບຽບຮຽບຮ້ອຍ, ຊຸກຍູ້, ສົ່ງເສີມສະມາຊິກພັກ ແລະ ອົງການຈັດຕັ້ງມະຫາຊົນ ປະຕິບັດພາລະບົດບາດ ຂອງຕົນຢ່າງຖືກຕ້ອງ ແລະ ຕິດພັນກັບ ຂໍ້ແຂ່ງຂັນຮັກຊາດ ແລະ ພັດທະນາ ເຮັດໃຫ້ເນື້ອໃນຂໍ້ແຂ່ງຂັນ 3 ດີ, 4 ບຸກ ແລະ 5 ເປັນເຈົ້າ ໄດ້ຮັບການຈັດຕັ້ງປະຕິບັດຢ່າງເປັນຂະບວນຟົດຟື້ນ ແລະ ມີຜົນສໍາເລັດໃນແຕ່ລະໄລຍະ, ປະກອບສ່ວນຢ່າງຕັ້ງໜ້າ ໃນການພັດທະນາກົມກອງ ໃຫ້ມີຜົນງານໃໝ່ໃຫ່ຍຫຼວງກວ່າເກົ່າ ແລະ ມີຄວາມກ້າວໜ້າຢ່າງບໍ່ຢຸດຢັ້ງ. ໜ່ວຍພັກ ພະແນກ ຕສ, ມີ ສະມາຊິກພັກທັງໝົດ 27 ສະຫາຍ, ຍິງ 11 ສະຫາຍ, ໃນນັ້ນ, ສະມາຊິກພັກສໍາຮອງ 2 ສະຫາຍ (ຍິງ).

ໜ່ວຍພັກ ພະແນກ ຕສ ແຂວງ ປະຕິບັດພາລະບົດບາດເປັນເສນາທິການ ໃຫ້ແກ່ຄະນະພັກຮາກຖານ ພະແນກ ຕສ ແຂວງ ໃນການຈັດຕັ້ງຜັນຂະຫຍາຍແນວທາງ, ນະໂຍບາຍຂອງພັກ, ມະຕິ, ຄໍາສັ່ງ,ແຈ້ງການແນະນໍາ ຂອງຄະນະພັກ - ຂັ້ນເທິງ, ນໍາພາວຽກງານການເມືອງ - ແນວຄິດ, ການຈັດຕັ້ງ, ແບບແຜນການນໍາພາ, ວຽກງານກໍ່ສ້າງພັກຄຸ້ມຄອງພັກ, ຄົ້ນຄ້ວາກໍານົດທິດທາງແຜນການນໍາພາ ຂອງຄະນະພັກ ໃນແຕ່ລະໄລຍະ, ນໍາພາ - ຊີ້ນໍາວຽກງານອົງການຈັດຕັ້ງມະຫາຊົນ ເຄື່ອນໄຫວຖືກຕ້ອງຕາມພາລະບົດບາດຂອງຕົນ ລວມທັງການຈັດຕັ້ງປະຕິບັດວຽກງານກວດກາ ແລະ ປະເມີນຜົນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃນແຕ່ລະໄລຍະ ໃຫ້ມີຜົນສໍາເລັດຕາມຄາດໝາຍທີ່ວາງໄວ້.

ຈາກຜົນງານການນຳພາ - ຊີ້ນໍາວຽກງານຜ່ານມາ ສາມາດຕີລາຄາຈັດປະເພດສະມາຊິກພັກ ປະເພດ ແຂງ, ຕີລາຄາປະເພດໜ່ວຍພັກ ເຂັ້ມແຂງ. ຈາກນັ້ນ, ຄະນະກຳມະການປະເມີນຜົນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນຂັ້ນແຂວງ ກໍໄດ້ປະກອບຄໍາເຫັນ ຕໍ່ບົດສະຫຼຸບ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກ ເພື່ອນໍາສະເໜີຄະນະພັກ - ຂັ້ນເທີງຄົ້ນຄວ້າອະນຸມັດ ເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2024 ໃນໂອກາດຕໍ່ໄປ.

ຕອນທ້າຍກອງປະຊຸມ ສະຫາຍ ສົມຈິດ ໂພທິສານ ຮັກສາການເລຂາຄະນະພັກຮາກຖານພະແນກ ຕສ ແຂວງ ປະທານກອງປະຊຸມ ກໍມີຄໍາເຫັນໂອ້ລົມຊີ້ທິດເຍືອງທາງ ຕື່ມອີກ.