ຂະແໜງບໍລິຫານລັດດີຈິຕອນ, ພະແນກເຕັກໂນໂລຊີ ແລະ ການສື່ສານ ແຂວງຈໍາປາສັກ ໄດ້ຈັດກອງປະຊຸມ ຝຶກອົບຮົມການຕິດຕັ້ງ ແລະ ນໍາໃຊ້ ລະບົບການສື່ສານພາກລັດ (G-chat), ແລະ ລະບົບການຈັດເກັບນໍາໃຊ້ຂໍ້ມູນຮ່ວມກັນພາກລັດ (G-share/G-Drive) ໃຫ້ແກ່ບັນດາ ພະແນກການ, ກົມກອງອ້ອມຂ້າງແຂວງ ຂື້ນໃນຕອນເຊົ້າຂອງວັນທີ 10 ຕຸລາ 2024, ທີ່ຫ້ອງປະຊຸມຊັ້ນ 02 ຂອງພະແນກ ຕສ ແຂວງ, ໂດຍການເປັນປະທານຂອງທ່ານ ນາງ ແສງທະລາ ປ້ອງວິໄລ ຮອງຫົວໜ້າພະແນກເຕັກໂນໂລຊີ ແລະ ການສື່ສານ ແຂວງຈໍາປາສັກ ເຂົ້າຮ່ວມມີ ຜູ້ຕາງໜ້າຈາກພະແນກການ, ກົມກອງອ້ອມຂ້າງແຂວງ ລວມທັງໝົດ 12 ທ່ານ, ຍິງ 07 ທ່ານ.

 

ໃນປັດຈຸບັນນີ້ ບັນດາເຄື່ອງມືເຕັກໂນໂລຊີທັນສະໄໝ ຖືວ່າເປັນໃຈກາງອັນສໍາຄັນໃນການຊ່ວຍຂັບເຄື່ອນ ແລະ ຫັນປ່ຽນຮູບແບບການເຮັດວຽກຈາກແບບດັ້ງເດີມໃຫ້ເປັນທັນສະໄໝ ເພື່ອເພີ້ມປະສິດທິພາບ, ຄວາມວ່ອງໄວ ໃນການເຮັດວຽກໃນຫ້ອງການ ຊ່ວຍຫຼຸດວຽກຂອງພະນັກງານ-ລັດຖະກອນ. ການນໍາໃຊ້ ລະບົບການສື່ສານພາກລັດ (G-chat) ແລະ ລະບົບການຈັດເກັບນໍາໃຊ້ຂໍ້ມູນຮ່ວມກັນພາກລັດ (G-share/G-Drive) ເຂົ້າໃນວຽກງານການບໍລິຫານລັດຂອງພວກເຮົາ ເພື່ອກ້າວໄປສູ່ທັນສະໄໝ ຕາມທິດຊີ້ນໍາຂອງແຂວງ. ແນໃສ່ເພີ່ມຂີດຄວາມຮູ້, ຄວາມສາມາດ ແລະ ທັກສະ ໃຫ້ແກ່ພະນັກງານ-ລັດຖະກອນພາຍໃນແຂວງຈໍາປາສັກ ຫັນເປັນດີຈີຕອນເທື່ອລະກ້າວ ເພື່ອນໍາໄປຜັນຂະຫຍາຍໃຫ້ພະນັກງານກົມກອງໃຫ້ນໍາໃຊ້ໄດ້ຢ່າງເປັນປົກກະຕິ ເຂົ້າໃນວຽກງານລັດຖະການຈາກພາຍໃນກົມກອງຂອງຕົນ ສູ່ກົມກອງພາຍນອກ.

ກອງປະຊຸມຍັງໄດ້ເປີດໃຫ້ມີການຖາມ-ຕອບການຕິດຕັ້ງ ແລະ ການນໍາໃຊ້ລະບົບດັ່ງກ່າວ ລະຫວ່າງນັກສໍາມະນາກອນ ແລະ ວິທະຍາກອນ ແລກປ່ຽນບົດຮຽນການນໍາໃຊ້ ຍົກສູງຄຸນນະພາບຂອງບັນດາລະບົບດັ່ງກ່າວ ຕາມຄວາມຮຽກຮ້ອງຕ້ອງການຂອງຜູ້ໃຊ້ຕົວຈິງ ກອງປະຊຸມໄດ້ປິດລົງໃນເວລາ 11: 45 ໂມງຂອງວັນດຽວກັນ.

ພາບ-ຂ່າວ: ຂະແໜງບໍລິຫານລັດດິຈິຕອນ